Texte grec :
| [18,39] Κατὰ δὲ τὴν Ἀσίαν Ἀρριδαῖος καὶ Πίθων οἱ τῶν
βασιλέων ἐπιμεληταὶ ἀναζεύξαντες ἀπὸ τοῦ Νείλου
μετὰ τῶν βασιλέων καὶ τῆς δυνάμεως ἧκον εἰς Τριπαράδεισον
τῆς ἄνω Συρίας. ἐνταῦθα δὲ Εὐρυδίκης
τῆς βασιλίσσης πολλὰ περιεργαζομένης καὶ ταῖς τῶν
ἐπιμελητῶν ἐπιβολαῖς ἀντιπραττούσης οἱ μὲν περὶ τὸν
Πίθωνα δυσχρηστούμενοι καὶ τοὺς Μακεδόνας ὁρῶντες
τοῖς ἐκείνης προστάγμασιν ἀεὶ μᾶλλον προσέχοντας
συνήγαγον ἐκκλησίαν καὶ τὴν ἐπιμέλειαν ἀπείπαντο,
οἱ δὲ Μακεδόνες ἐπιμελητὴν εἵλαντο τὸν Ἀντίπατρον
αὐτοκράτορα. οὗτος δὲ μετ´ ὀλίγας ἡμέρας καταντήσας
εἰς Τριπαράδεισον κατέλαβε τὴν Εὐρυδίκην στασιάζουσαν καὶ τοὺς
Μακεδόνας ἀπαλλοτριοῦσαν ἀπὸ τοῦ
Ἀντιπάτρου. ταραχῆς δὲ μεγάλης οὔσης ἐν ταῖς
δυνάμεσι καὶ κοινῆς ἐκκλησίας συναχθείσης ὁ μὲν
Ἀντίπατρος διαλεχθεὶς τοῖς πλήθεσι τὴν μὲν ταραχὴν
κατέπαυσε, τὴν δ´ Εὐρυδίκην καταπληξάμενος ἔπεισε
τὴν ἡσυχίαν ἄγειν. μετὰ δὲ ταῦτα τὰς σατραπείας ἐξ
ἀρχῆς ἐμερίσατο καὶ Πτολεμαίῳ μὲν τὴν προϋπάρχουσαν
προσώρισεν· ἀδύνατον γὰρ ἦν τοῦτον μεταθεῖναι διὰ τὸ δοκεῖν
τὴν Αἴγυπτον διὰ τῆς ἰδίας
ἀνδρείας ἔχειν οἱονεὶ δορίκτητον. καὶ Λαομέδοντι μὲν
τῷ Μιτυληναίῳ Συρίαν ἔδωκε, Φιλοξένῳ δὲ τὴν
Κιλικίαν, τῶν δ´ ἄνω σατραπειῶν Μεσοποταμίαν μὲν
καὶ τὴν Ἀρβηλῖτιν Ἀμφιμάχῳ, τὴν δὲ Βαβυλωνίαν
Σελεύκῳ, Ἀντιγένει δὲ τὴν Σουσιανὴν διὰ τὸ τοῦτον
πρῶτον πεποιῆσθαι τὴν ἐπὶ τὸν Περδίκκαν ἐπίθεσιν,
Πευκέστῃ δὲ τὴν Περσίδα, Τληπολέμῳ δὲ τὴν Καρμανίαν,
Πίθωνι δὲ Μηδίαν, Φιλίππῳ δὲ τὴν Παρθυαίαν, Ἀρίαν δὲ καὶ
Δραγγηνὴν Στασάνδρῳ τῷ
Κυπρίῳ, τὴν δὲ Βακτριανὴν καὶ Σογδιανὴν Στασάνορι
τῷ Σολίῳ ἀπὸ τῆς αὐτῆς ὄντι νήσου. Παροπανισάδας
δὲ Ὀξυάρτῃ προσώρισε τῷ Ῥωξάνης πατρὶ τῆς Ἀλεξάνδρου
γυναικός, τῆς δὲ Ἰνδικῆς τὰ μὲν συνορίζοντα
Παροπανισάδαις Πίθωνι τῷ Ἀγήνορος, τὰς δ´ ἐχομένας
βασιλείας τὴν μὲν παρὰ τὸν Ἰνδὸν ποταμὸν Πώρῳ,
τὴν δὲ παρὰ τὸν Ὑδάσπην Ταξίλῃ (οὐ γὰρ ἦν τούτους
τοὺς βασιλεῖς μετακινῆσαι χωρὶς βασιλικῆς δυνάμεως
καὶ ἡγεμόνος ἐπιφανοῦς), τῶν δὲ πρὸς τὴν ἄρκτον
κεκλιμένων Καππαδοκίαν μὲν Νικάνορι, Φρυγίαν δὲ
τὴν μεγάλην καὶ Λυκίαν Ἀντιγόνῳ, καθάπερ πρότερον
ἔσχε, Καρίαν δὲ Κασάνδρῳ, Λυδίαν δὲ Κλείτῳ, Φρυγίαν
δὲ τὴν ἐφ´ Ἑλλησπόντῳ Ἀρριδαίῳ. στρατηγὸν
δὲ τῆς βασιλικῆς δυνάμεως ἀπέδειξεν Ἀντίγονον, ᾧ
προστεταγμένον ἦν καταπολεμῆσαι Εὐμενῆ τε καὶ
Ἀλκέταν· παρέζευξε δὲ τῷ Ἀντιγόνῳ χιλίαρχον τὸν
υἱὸν Κάσανδρον, ὅπως μὴ δύνηται διαλαθεῖν ἰδιοπραγῶν.
αὐτὸς δὲ τοὺς βασιλεῖς ἀναλαβὼν καὶ τὴν ἰδίαν
δύναμιν προῆγεν ἐπὶ Μακεδονίαν, κατάξων τοὺς βασιλεῖς
ἐπὶ τὴν πατρίδα.
|
|
Traduction française :
| [18,39] En Asie, Arrhidée et Python, nommés tuteurs
des rois, quittèrent avec les troupes royales les bords du
Nil et se rendirent à Triparadisum, dans la haute Syrie. Là
la reine Eurydice, très intrigante de son naturel, s'immisça
dans les affaires de la régence. Python, mécontent de ces
intrigues, et voyant d'ailleurs que les Macédoniens se montraient
de plus en plus soumis aux ordres de cette reine,
convoqua une assemblée et abdiqua la tutelle qui lui avait
été confiée. Les Macédoniens investirent alors Antipater de
l'autorité suprême de la régence. Peu de jours après, celui-ci
arriva à Triparadisum, et fit arrêter Eurydice, qui avait
fomenté une insurrection et excité les Macédoniens contre
lui. Cet acte fit éclater des troubles dans les armées; Antipater
convoqua alors une assemblée générale; par ses discours,
il calma la sédition et décida Eurydice, par des menaces,
à se tenir tranquille. Ces troubles apaisés, il procéda
à un nouveau partage des satrapies. Ptolémée garda l'Égypte
comme une propriété conquise à la pointe de l'épée;
et il aurait été dailleurs impossible de l'en faire sortir.
Laomédon le Mitylénéen obtint la Syrie; Philoxène, la
Cilicie. Parmi les satrapies de l'Asie supérieure, Amphimaque
reçut en partage la Mésopotamie et l'Arbélie ; Antigone,
la Susiane pour s'être déclaré le premier contre Perdiccas;
Peuceste, la Perse proprement dite ; Tlépolème, la
Carmanie; Python, la Médie ; Philippe, la Parthie; Stassandre
de Cypre, l'Arie et la Drangiane; Stasanor de Solium,
également originaire de Cypre, la Bactriane et la
Sogdiane; Oxyarte, père de Rhoxane, mariée à Alexandre,
le pays des Paropamisades; Python, fils d'Agénor, la contrée
de l'Inde voisine des Paropamisades. Quant aux
royaumes indiens, celui qui était situé au delà de l'Hydaspe
échut à Taxile; car il n'était guère possible de déplacer ces
rois de leurs États. Pour ce qui concerne les provinces
septentrionales, Nicanor eut la Cappadoce; Antigone, la grande
Phrygie et la Lycie qu'il possédait antérieurement; Cassandre,
la Carie; Clitus, la Lydie, et Arrhidée, la Phrygie
de l'Hellespont. Antigone fut nommé commandant de l'armée
royale, et chargé de soumettre Eumène et Alcétas.
Antipater lui adjoignit comme chiliarque son fils Cassandre,
afin qu'Antigone ne pût agir secrètement pour son
propre compte. Enfin Antipater se remit en route avec son
armée et avec les rois qu'il ramena en Macédoine.
|
|
