Texte grec :
| [7,26] Οὕτως ἐν ταῖς ἐφημερίσι ταῖς βασιλείοις ἀναγέγραπται,
καὶ ἐπὶ τούτοις ὅτι οἱ στρατιῶται ἐπόθησαν
ἰδεῖν αὐτόν, οἱ μέν, ὡς ζῶντα ἔτι ἴδοιεν, οἱ δέ, ὅτι
τεθνηκέναι ἤδη ἐξηγγέλλετο, ἐπικρύπτεσθαι δὲ αὐτοῦ
ἐτόπαζον πρὸς τῶν σωματοφυλάκων τὸν θάνατον, ὡς
ἔγωγε δοκῶ· τοὺς πολλοὺς δὲ ὑπὸ πένθους καὶ
πόθου τοῦ βασιλέως βιάσασθαι ἰδεῖν Ἀλέξανδρον. τὸν
δὲ ἄφωνον μὲν εἶναι λέγουσι παραπορευομένης τῆς
στρατιᾶς, δεξιοῦσθαι δὲ ὡς ἑκάστους τήν τε κεφαλὴν
ἐπαίροντα μόγις καὶ τοῖν ὀφθαλμοῖν ἐπισημαίνοντα.
λέγουσι δὲ αἱ ἐφημερίδες αἱ βασίλειοι ἐν τοῦ Σαράπιδος
τῷ ἱερῷ Πείθωνά τε ἐγκοιμηθέντα καὶ Ἄτταλον
καὶ Δημοφῶντα καὶ Πευκέσταν, πρὸς δὲ Κλεομένην
τε καὶ Μενίδαν καὶ Σέλευκον, ἐπερωτᾶν τὸν θεὸν εἰ
λῷον καὶ ἄμεινον Ἀλεξάνδρῳ εἰς τὸ ἱερὸν τοῦ θεοῦ
κομισθέντα καὶ ἱκετεύσαντα θεραπεύεσθαι πρὸς τοῦ
θεοῦ· καὶ γενέσθαι φήμην τινὰ ἐκ τοῦ θεοῦ μὴ
κομίζεσθαι εἰς τὸ ἱερόν, ἀλλὰ αὐτοῦ μένοντι ἔσεσθαι
ἄμεινον. ταῦτά τε ἀπαγγεῖλαι τοὺς ἑταίρους καὶ
Ἀλέξανδρον οὐ πολὺ ὕστερον ἀποθανεῖν, ὡς τοῦτο
ἄρα ἤδη ὂν τὸ ἄμεινον. οὐ πόρρω δὲ τούτων οὔτε
Ἀριστοβούλῳ οὔτε Πτολεμαίῳ ἀναγέγραπται. οἱ δὲ
καὶ τάδε ἀνέγραψαν, ἐρέσθαι μὲν τοὺς ἑταίρους αὐτὸν
ὅτῳ τὴν βασιλείαν ἀπολείπει, τὸν δὲ ὑποκρίνασθαι
ὅτι τῷ κρατίστῳ· οἱ δέ, προσθεῖναι πρὸς τούτῳ τῷ
λόγῳ ὅτι μέγαν ἐπιτάφιον ἀγῶνα ὁρᾷ ἐφ´ αὑτῷ
ἐσόμενον.
|
|
Traduction française :
| [7,26] Tel est le bulletin que j'ai tiré des journaux du roi. Ils ajoutent que les
soldats désirant le voir avant qu'il expirât, et s'imaginant, sur le bruit de sa
mort déjà répandu, qu'on voulait leur en dérober la nouvelle, forcèrent les
portes. Le prince avait déjà perdu la parole, soulevant avec peine la tête et
les yeux pour leur donner quelques signes de bienveillance, il leur tendit la main.
Python, Attale, Démophon, Peucestas, Cléomène, Menidas et Séleucus passèrent la
nuit au temple de Sérapis. Ils demandèrent au dieu, s'il ne convenait point de
transporter Alexandre dans son temple. « Il sera mieux où il est », répondit l'oracle.
On rapporta cette réponse à Alexandre, qui expira quelques instants après. Sa
mort était le sens que cachait l'oracle.
Ptolémée et Aristobule s'accordent sur ces détails. D'autres historiens
rapportent que les Hétaïres lui demandant à qui il laissait l'empire, il
répondit : "au plus digne", et qu'il ajouta : « Les jeux funèbres que l'on
célébrera sur ma tombe seront sanglants. »
|
|
